Хоротооҕу «Кэскил» оҕо сайдар киинэ төрөөбүт тыл түһүлгэтин тэрийдэ

Um-Redactor17.02.24 10:36

“Ийэ тыл,  сурук –бичик” күнүгэр аналлаах “Төрөөбүт төрүт тылбын таптыыбын” улуус уһуйааннарын оскуолаҕа киириэн иннинээҕи  5-7 саастаах оҕолоругар аналлаах биирдиилээн сахалыы хоһоон ааҕыытын күрэҕэ  Хоротооҕу «Кэскил” оҕо сайдар киинин тэрээһининэн буолан ааста.  Барыта 10 уһуйаантан 43 иитиллээччи кэлэн кыттыыны ылла. Саха суруйааччылара төрөөбүт дойдуга аналлаах хоһоонноруттан ааҕыы  сыала — төрөөбүт дойдуга тапталы , бэриниилээх буолууну, кининэн киэн туттууну, төрөөбүт тыл сүмэтин, эриэккэһин, кэрэтин  оҕоҕо кыра сааһыттан иҥэрии.

Күрэҕи уһуйааммыт иитиллээччитэ Сандаара Саввинова уонна иитээччибит Антонида Николаева  оһуохайынан киэҥ түһүлгэ тэрийэн арыйдылар. Кыттааччылары, ыалдьыттары улуустааҕы үөрэҕирии тэрилтэтин начальнигын солбуйааччы Леонид Николаевич Огочонов, «Кэскил» оҕо сайдар киинин директора Саргылана Николаевна Евдокимова эҕэрдэлээтилэр.

Күрэҕи сыаналаабыт  дьүүллүүр сүбэ састааба: Хоротооҕу А.Д.Филиппов аатынан сынньалаҥ киинин директора Т.Е.Семенова, “Хоросоо” мини- театр салайааччыта И.В.Касьянов,  Г.Н.Чиряев  аатынан Хоро орто оскуолатын саха тылын, литературатын учуутала А.Е.Назарова.

Курэх “Кылаан чыпчаалын” үрдүк аатын “Кэнчээри”  оҕо сайдар киинин иитиллээччитэ Филиппова Майя ылла.

1 миэстэни — “Кэнчээри”  ого сайдар киинин иитиллээччитэ Семенова Амина, 2 миэстэни-  “Ньургуһун” оҕо сайдар киинин иитиллээччитэ Кардашевская Настя, 3 миэстэни — “Ньургуһун” оҕо сайдар киинин иитиллээччитэ Игнатьева Ангелия ылан үөрдүлэр.

Анал ааттар:  “Кэскиллээх толорооччу” – Михайлов Стаска (5№ “Кэнчээри”   оҕо сайдар киинэ ),

“Хомоҕой хоһоонньут” – Василина Софроноваҕа (7№ “Сказка” оҕо сайдар киинэ),

“Дорҕоон Дуорай” – Каролина Андросоваҕа (6 №“Солнышко” уһуйаан),

” Иэйиилээх толорооччу” – Сахайаан Ивановка (1№ “Ньургуһун ” оҕо сайдар киинэ),

“Кэрэхсэбиллээх хоһоонньут” – Милана Ымыковаҕа (5№ «Кэнчээри” о5о сайдар киинэ),

“Сиэдэрэй көстүүлээх толорооччу” – Илья Син Хойга (1№ “Ньургуһун” оҕо сайдар киинэ),

Олохтоох библиотека анал бириистэрин Роман Софроновка (“Кэскил” оҕо сайдар киинэ), Виктория Илларионоваҕа (“Кэскил” оҕо сайдар киинэ) туттарылыннылар.

Хоһоон күрэҕэр кэлэн кыттыбыт бары иитиллээччилэрбитигэр, кинилэр салайааччыларыгар, төрөппүттэригэр махталбытын тиэрдэбит! Төрөөбүт төрүт сахалыы тылбытын өссө сайыннаран иһиэҕиҥ, өлбөт – сүппэт төлкөлүөҕүҥ !